嘩眾取寵

我未睇，但係我個妹同我個表妹睇咗，仲有小鬼維圍喂都去咗，超勁羨慕。再加上佢舊年既男磨坊多人多無得睇，更加之羨慕小妹同表妹。唔知會唔會出碟呢？

聽聞今次既 format 同之前幾次都咁上下，有少少失望。我呢幾年其實都等緊佢一次既破格，well...其實我既要求唔係好高架咋，就係佢唔好再用某一句格言然後就話呢句格言可以應用 喺呢度呢度同呢度，佢第一次咁做既時候係好新鮮好搞笑，第二次都仲可以，但再係咁落去就唔係好得喇，覺得有少少自己翻炒自己既感覺。同埋叫ｄ觀眾儲埋一齊先拍手舉都係，可唔可以唔好再講？翻炒俾我既感覺就係佢交唔足貨，我會有少少覺得被搵笨咁。

話雖如此，我仍然咁支持子華啦。前排睇完絕代商驕，好空虛，就上utube搵佢既舊作睇去填補我既空虛，有好多真係第二次睇既時候先至知佢究竟想講乜，而且第二，什至係第三第四次睇都係咁正。

ｄ人對今次呢個show 既評價好壞參半，我會盡量唔去存有太大期望，反正期望越小， enjoyment 越大，但我仍然好期待十一月既來臨！