忽然大肚

唔係我．

前一兩個月發現有一個中同（唔係好熟嗰隻）生左個Ｂ；上次先啱啱講完識得有人計劃生仔；另一邊廂，今日發現有朋友大左肚，仲已經５個月，好得人驚．

前排先聽到有好多朋友陸續喺今年結婚，呢排就突然勁多人生仔，真係想唔認老都唔得．唔知幾時要開始去喪禮？（阿媽實話：大吉利是過你，講埋ｄ咁既野！）

嘩，ｄ人真係好快手，大部份其實都係結左婚無耐，唔怪得之由我結婚第一日開始ｄ人就已經不斷又不斷咁問我幾時生．原來，結婚，喺好多人心中，真係代表開始生仔的嗎？

又記得有個朋友係好唔願結婚嗰亭人，但佢話可唔可以淨係生仔，唔結婚？結婚，除左代表開始生仔，乜原來仲係為左生仔架咩？（請留意，結婚代表生仔，同結婚為咗生仔，係兩樣唔同既 concept）你唔願意同呢個人結婚，但願意同佢生仔，呢個邏輯係咪有少少問題？

我始終都覺得係，無錯，ＢＢ真係好得意，我亦都好鐘意玩但你諗吓佢大到十幾歲嗰時會點？我諗番我自己十幾歲嗰時，我都唔算好曳嗰隻啦，但都難免唔係一條頂心 cham；再諗諗而家ｄ細路，仲死，唔駛十幾歲啦，未到十歲已經 ipod, DS 不離身，更加有好多世風日下的小朋友，諗起都怕怕．