娛樂圏血肉史II

等待已久既 show，星期六晚終於去咗睇．

黃子華仍然係咁正．我實在太愛你！♥

以下有 spoiler 成份，看者自負．

好高興，今次子華係用環保杯飲水，唔再係用膠樽．抵讚！

好奇怪既係，頭十分鐘，子華喺大銀幕上既面色都幾殘吓，但之後就好咗好多．係我老眼昏花丫，定係你打既 botox 開始生效，抑或係個 adaptive air brushing algorithm 開始 work？

喺香港上既時候，我睇過一兩則有關個 show 既報導（其實唔係太想睇有關既報導，好同唔好，我都唔想知得太多，免得 spoil 咗），以為會係以"wa苦" 其他藝人 or 娛樂圏既風氣為主，所以都對個 show 冇乜特別期望，只係諗住去笑一吓．唔係話笑唔好，但係取笑人其實唔難，it’s easy to make something sound stupid or riduculous. 但我個人其中一個欣賞黃子華之處，係佢除咗笑之外，仲係有ｄ野，呢個就係佢同其他棟篤人既分別．今次以為只係以取笑其他人為主題，但原來真係講佢自己既血肉史喎，雖然有幾多成真就不得而知，但係有ｄ意思．

接近最後溥儀個段有ｄ沉重，我個人覺得係一個不錯既嘗試，但其他人有幾接受，就真係唔知道．如果呢一段係子華想驗試觀眾對佢演一ｄ認真既角色既話，喺我哋嗰埸黎講，可以算係失敗，亦可以算係成功．因為條片一出，ｄ人已經無啦啦笑，唔係一個半個喎，係都幾多人吓架噃．我真係唔知佢哋笑乜．基本上，一見到黃子華，ｄ人就好似本能咁笑出黎，唔知佢哋想點．成功既係，到咗條片中段開始就無人再笑，咁可唔可以算係觀眾開始接受呢個角色？

開頭播片嗰ｄok 喎，我唔覺得係搵笨，因為所播既片都好 relevant. 反而令我覺得有ｄ笑點，真係能夠經得起時間既考驗，到咗今時今日，仲係咁好笑．

不過我唔係咁鍾意用音樂去做 transition，還是覺得子華個種轉咗話題你都唔知既 transition 正ｄ．

今次又無上兩年以黎唱咁多歌，唔係話唱歌唔好，但今次好似反樸歸真一ｄ，有服裝，但無ｄ古靈精怪既髮型，I like it!

有帶相機但到最後一刻決定一張相都唔影，個位無舊年咁正，況且要睇相既話上網大把有得睇，仲要比我影既靚好多，所以影都無謂，不如全情投入去 enjoy 個 show 好過．我覺得我既決定係絕對正確．

當子華講到佢人生第一次去紅館係去睇林子样演唱會，同埋佢坐喺山頂既時候，我自己都打咗個突．"唔係咁橋吓話？"，我人生第一次去紅館亦都係睇林子样演唱會噃（當然，同我一齊去成班既表兄弟姊妹大家都係第一次）．我哋會唔會係去咗同一個林子样演唱會呢？會唔會係同一場呢？會唔會係坐喺附近呢？？可能性當然不大，但我仍然忍唔住咁幻想，可能我哋有一刻係好接近，但就好似做戲咁樣，就咁擦身而過．我仲記得當年我哋係坐喺山頂到唔山頂既尾幾行，我諗子華唔會山頂得咁緊要卦...其實，我當時咁細個，連邊個係黃子華都未知．

題外話，小人小時候無錯是喜歡過林子样的，三歲定八十，我係由細到大都鍾情於老男人！hahahaha….

今年完 show 之後無去等子華，其實我自己都唔知道去等好，定係唔等好．上次既經歷讓人有點沮喪，我唔想再沮喪多一次，但又想再碰一碰運氣．今次由於同糖一齊去睇，所以我就以 "我怎能要求我既朋友喺零下十幾度陪我食西北風呢？" 為原因，說服自己唔好去．唔知道子華有冇發現到多人多嗰個每年都一條友單拖去等佢嗰個戇居某梨今年無出現到呢？定係覺得好高興無人煩佢？

子華，棟篤笑，還是覺得你最好．