三國演義

因為三國殺既原故，挑起了我想重睇三國演義既癮，但我本書喺香港娘家，於是喺網山搵到一個 source, 得閒喺公司睇吓，一百二十回，終於睇完．

喺公司睇既一個唔好處，就係一來成日都驚被人發現，（所以通常都係 lunch time 睇）；二來有時好想追落去，搞到過咗 lunch time 仲成日心思思想睇，

今次既重睇，故事精彩之處仍然係覺得好精彩，但同時間，多咗一ｄ細個小學嗰時感受唔到既嘢．

感覺係有ｄ唏噓，好似睇住一個個 kingdom 由無變有，又由強盛變到沒落，老豆好辛苦咁同ｄ老臣子一齊打落黎既江山，話咁易就俾ｄ子孫敗哂．

又發現，原來姜維成日都輸，唔知係因為佢身邊無人幫到佢手吖，定係佢真係咁無用．我記憶中既姜維係勁好多架噃，唉，佢令我有ｄ失望．就算得到孔明傳受俾佢既兵法，連一個小小既鄧芝都鬥唔過，究竟係鄧芝好才智，定係姜維渣呢？同時證明，只懂得佈陣兵法係唔夠既，能否洞察人心亦都好緊要，而呢一樣嘢，有少少係靠天才，就算教你都未必學得到．

以前睇三國既時候亦已經覺得好可惜，孔明真係有幾次好有機會可以打 'lump' 魏國，後主實在太可惡．今次多咗既感慨係，當年孔明出山既時候，已經同劉備講話當佢幫完劉備打完江山之後，係希望可以隠居返去耕田，一方面佢真係好自大，未出山就已經諗住成功之後要收山；另一方面，又覺得佢好慘，最後都成功唔到，辭官歸故里既願望始終都實現唔到．

除咗孔明之外，最值得人欣賞既就係趙雲，記憶中既趙雲係一個好英雄既人物，今次重睇，更加發現，有唔少方面，佢比關公更值得敬重．當然，關公過五關斬六將既義氣真係無得頂，但可惜佢臨尾香，品格上好似有少少缺憾，但趙雲好似真係好完美．

三國演義，應該係我人生中重睇得最多既一本書（漫畫另計 XD），唔知會唔會再睇呢？如果會，又會係幾時呢？

其實，我係應該放多ｄ時間去溫習考試先啱... sigh…